Að vinna með Grænu skrefin

Hvernig á að vinna með Grænu skrefin?

Hér eru einfaldar leiðbeiningar og hvatning fyrir ykkur sem eruð að byrja að vinna með Grænu skrefin, á ykkar vinnustað. Kynnið ykkur fyrst markmið og tilgang Grænu skrefanna á þessari síðu.

  • Hugsið þetta eins og líkamsræktarþjálfun – að styrkja grunninn fyrst og byggja svo upp frá því. Að taka Grænu skrefin er auðvelt í byrjun og það er eitthvað sem flestir ráða auðveldlega við. Þegar allir eru orðnir mjög meðvitaðir um hvað stendur til og hvað á að gera þá er eftirleikurinn auðveldari.
  • Þessi heimasíða er ykkar líflína – hér eru allar upplýsingar sem ykkur vantar. Ef ykkur vantar frekari upplýsingar þá hafiði samband á graenskref@reykjavik.is
  • Athugið að aðgerðirnar eru hugsaðar til að henta smærri sem stærri vinnustöðum Reykjavíkurborgar og það geta verið aðgerðir sem ekki eiga við hjá öllum.
  • Gott er að útbúa plan um það hvernig þið hyggist innleiða Grænu skrefin og kannski gera grófa úttekt á vinnustaðnum með aðstoð gátlista hvers skrefs. Á hverju er best að byrja? Hvar sjáið þið helst vandamál? Hver gæti séð um ákveðnar aðgerðir, o.sv.frv.?
  • Látið allt starfsfólk vita hvað stendur til og til hvers er ætlast af öllum. Þetta er samvinna og þetta gengur alltaf best þegar allir eru með.
  • Útbúið hvatningarpósta til starfsmanna. Hvetjið alla til að vera með og haldið áfram að hvetja þegar líður á ferlið. Gott er að senda smá upplýsingar með hvatningarpóstunum, til dæmis um hvað þið eruð búin að gera, hvaða árangur hefur náðst eða hvað á eftir að gera og hvernig þið ætlið að tækla það. Sumir skilja betur tölur heldur en umræður þannig að þá er kannski best að setja upp tölulegan árangur eða hvað er mikið eftir?
  • Sniðugt væri að útbúa blað með góðum hugmyndum eða ráðum fyrir starfsfólk, kannski eitt ráð í mánuði, og hengja upp á áberandi stað. Hér á vefsíðunni má finna fjölmargar hugmyndir undir ítarefni, heilræði eða í skrefunum sjálfum.
  • Fylgist með á Facebook og Workplace síðum Grænna skrefa. Á Facebook eru nýir vinnustaðir boðnir velkomnir og þar er hvatning og almennar upplýsingar, á Workplace er hægt að leita ráða og fá innblástur frá öðrum.
  • Minna okkur stöðugt á það hvers vegna við erum að þessu. Minna okkur á að við erum að gera breytingar á rútínunni á vinnustaðnum og það er misauðvelt fyrir fólk, sumir eru fljótari en aðrir að aðlagast. Minna okkur á að þetta er langhlaup og breytingar til frambúðar – ekki bara átak í einn mánuð.

Umhverfis- og skipulagssvið
Borgartúni 12
-14
Hafið samband